Жорий йилнинг 19 апрель куни Словакия Республикасининг Ўзбекистон Республикасидаги Фавқулодда ва Мухтор элчиси Виктор Борецкий билан BMB Trade Group компанияси Бош директорининг биринчи ўринбосари Мирғулом Усмонов бошчилигидаги делегация аъзолари ўртасида учрашув бўлиб ўтди.
Учрашув давомида BMB Trade Group ва Словакиянинг етакчи компаниялари ўртасида ўзаро манфаатли ҳамкорликни йўлга қўйиш имкониятлари муҳокама қилинди.
Хусусан, томонлар Словакия бозорига заъфарон, қуритилган мевалар, доривор ўсимликлар ва бошқа турдаги қишлоқ хўжалиги маҳсулотларини етказиб беришни ташкил этиш соҳасидаги ҳамкорлик истиқболларини муҳокама қилдилар.
Шу билан бирга, ўзбекистонлик туристларнинг Словакияга саёҳатларини ташкил этиш, икки мамлакат ишбилармон доираларининг ташрифларини (business matching) ташкил этиш масалалари ҳам кўриб чиқилди.
Мулоқот давомида BMB Trade Group компаниясининг Ўзбекистонда тадбиркорлик фаолиятини бошлашдан манфаатдор Словакия компаниялари учун консалтинг хизматлари икки томонлама ҳамкорликни ривожлантиришга қўшимча туртки бўлиши мумкинлиги таъкидланди.
Учрашув якунида томонлар мазкур масалалар юзасидан мулоқотни давом эттириш ва BMB Trade Group компанияси ҳамда Словакия етакчи компанияларининг манфаатдор вакиллари ўртасида учрашувларини ташкил этиш бўйича келишувга эришилди.
