АМЕРИКА ҚЎШМА ШТАТЛАРИНИНГ ФАВҚУЛОДДА ВА МУХТОР ЭЛЧИСИ БИЛАН УЧРАШУВ БЎЛИБ ЎТДИ
Жорий йилнинг 25 октябрь куни BMB HOLDING Кузатув Кенгаши раиси Бекзод Маматқулов, Америка Қўшма Штатларининг мамлакатимиздаги Фавқулодда ва Мухтор элчиси Жонатан Хеник билан учрашди.
Учрашувда Ҳолдинг тизимида ишлаб чиқарилаётган маҳсулотларни Америка бозорларига экспорт қилиш, хусусан, заъфарон маҳсулотлари ва чуқур қайта ишланган қишлоқ хўжалиги маҳсулотларни етказиб бериш орқали савдо-иқтисодий алоқаларни янада жадаллаштириш масалалари муҳокама қилинди.
Жумладан, АҚШнинг Costco Wholesale ва McCormick & Company каби йирик савдо тармоқларига заъфарон, заъфаронли маҳсулотларни етказиб бериш, Walmart ва бошқа йирик ритейл бозорига чуқур қайта ишланган қишлоқ хўжалиги маҳсулотларини етказиб бериш ҳамда Ҳолдинг Кузатув Кенгаши раиси бошчилигидаги делегациянинг Америка Қўшма Штатларига ташрифини амалга ошириш масалалари муҳокама қилинди.
Ўз навбатида Ж. Хеник мамлакатимизда етиштирилаётган заъфарон экспорти учун FDA рухсатномаси ва USDA Organic сертификати олинганлигини юқори баҳолаб, океан орти мамлакатидаги савдо расталарида ҳам тез орада BMB Za’faron маҳсулотлари ва Ҳолдингнинг чуқур қайта ишланган қишлоқ хўжалиги маҳсулотлари бўлишига ишонч билдирди.
Шунингдек, элчи томонидан Ҳолдинг таркибида жорий йилда қишлоқ хўжалиги маҳсулотларини чуқур қайта ишлаш ҳамда заъфаронни қуритиш ва қайта ишлаш корхоналари фаолияти йўлга қўйилганлиги эътироф этилди.
Учрашув якунида ўзаро ҳамкорлик алоқаларини давом эттириш, шунингдек, томонлар учун ҳар томонлама манфаатли йўналишларда савдо-иқтисодий алоқаларни ривожлантириш юзасидан келишиб олинди.
