ИТАЛИЯДАН КЕЛТИРИЛГАН ЗАЪФАРОН ПИЁЗБОШИЛАРИНИ ЭКИШ ИШЛАРИ ЯКУНИГА ЕТДИ
Аввал хабар берганимиздек, мазкур йилдан бошлаб заъфарон етиштириш янги босқичга кўтарилди. Жиззах вилояти Бахмал туманининг бепоён дала-ю қирларида эзгу ниятлар билан экилган заъфарон пиёзбошларининг охирги партияси экиб бўлинди.
Бу йилги экиш мавсуми 20 сентябрдан бошланиб, 28 октябрга қадар давом этди. Майдонларга қарийб 20 мингдан ортиқ ишчилар жалб этилиб, плантация ҳудуди 700 гектарга етказилди.
Мазкур лойиҳа ҳудуднинг иқтисодий салоҳиятини ошириш, қишлоқ хўжалиги соҳасида янги имкониятлар яратиш ва маҳаллий аҳолини иш билан таъминлаш нуқтаи назаридан аҳамиятлидир.
Бу йил иқлим ва тупроқ шароитларини ҳисобга олган ҳолда, энг сўнгги ноу-хаулар, хусусан, экин майдонларида сув тежовчи гидрогель маҳсулоти қўлланилди. Келгусида миришкорларнинг машаққати, агрономнинг заҳмати, ишчи-хизматчиларнинг 
пешона тери эвазига етиштирилган ҳосилдан 15 га яқин маҳсулот тайёрланиб, маҳаллий бозор расталарига ҳамда хорижга экспорт қилинади.
Ота-боболаримиз «Ерга меҳри борнинг ҳосили мўл бўлур», деганларидек, аҳилликда меҳнат қилаётган корхона жамоасининг мақсадлари юксак — оиласига ризқу насиба олиб кириш баробарида, ҳудуд иқтисодий салоҳиятига ҳисса қўшишдир.
