Жорий йилнинг 28 январь куни Польшанинг Савдо-саноат палатасида BMB HOLDING Кузатув Кенгаши раиси Бекзод Маматқулов ҳамда палата Президенти Марек Клочко ўртасида учрашув бўлиб ўтди.
Мулоқот мобайнида палата таркибидаги Польша ишбилармон доиралари вакиллари, хорижий компаниялар билан экспорт ва импорт йўналишида ҳамкорлик қилиш, мамлакатнинг йирик савдо тармоқлари билан савдо-иқтисодий алоқаларни ўрнатиш масалалари муҳокама қилинди ҳамда қишлоқ хўжалиги маҳсулотлари, чуқур қайта ишланган маҳсулотларни етказиб бериш бўйича ҳамкорлик қилишга келишиб олинди.
Шунингдек, «Contractus» компанияси Президенти Витольд Карчевский билан конструктив руҳда навбатдаги учрашув бўлиб ўтди.
Учрашувда заъфарон ҳамда қўшилган қийматга эга, чуқур қайта ишланган қишлоқ хўжалиги маҳсулотларини Польша бозорига экспорт қилиш, мазкур мамлакатдан эса агросаноатнинг илғор технологиялари, юқори сифатли уруғ навларини синов тариқасида Ҳолдингнинг қишлоқ хўжалиги майдонларида экиш ҳамда тажриба алмашиш масалалари муҳокама қилиниб ушбу йўналишларда ҳамкорлик алоқаларини йўлга қўйишга келишиб олинди.
