Жорий йилнинг 10 февраль куни BMB HOLDING Бош офисида Германия Федератив Республикасининг 1876 йилда ташкил этилган глобал миқёсда саноат жиҳозларини ишлаб чиқарувчи — AMANDUS KAHL HAMBURG компанияси ва инновацион саноат ечимларини тақдим этувчи JET TEAM консалтинг компанияси вакиллари билан учрашув бўлиб ўтди.
Учрашув давомида меҳмонларга Ҳолдинг, унинг таркибидаги корхоналар ва уларнинг имкониятлари ҳамда маҳсулотлар ассортименти ҳақида батафсил маълумот берилди.
Шунингдек, жорий йил февраль ойи охири ва март ойи бошида AMANDUS KAHL HAMBURG компанияси мутахассислари Ҳолдинг таркибидаги корхоналарга ташриф буюриб уларнинг фаолияти ва иш жараёнлари билан танишиб чиқиш ҳамда сублимация, шок ва акустик музлатиш жараёнлари бўйича концептуал ечимлар бериш бўйича келишувга эришилди.
Қолаверса, AMANDUS KAHL HAMBURG компаниясининг саноат ускуналари ва жараёнларини ташкил этишга ихтисослашган ўқув марказида BMB HOLDING таркибидаги корхоналарнинг технологларини қайта ишлаш ва чуқур қайта ишлаш бўйича малакасини ошириш таклиф этилди.
Учрашув сўнггида ушбу компания билан ҳамкорликда Ҳолдинг таркибидаги корхоналар томонидан етиштириладиган маҳсулотларни Европа Иттифоқи мамлакатларига экспорт қилишда ҳамкорлик қилишга келишиб олинди.
