BMB HOLDING ФУТЗАЛ РИВОЖИ ЙЎЛИДА ЯНА БИР МУҲИМ ҚАДАМНИ ТАШЛАДИ
Жорий йилнинг 24 октябрь куни BMB HOLDING Бош офисида BMB PFCнинг Олий лига 2024-2025 йил мавсуми учун жамоа янги аъзоларининг таништирув маросими бўлиб ўтди.
Тадбир аввалида клуб Президенти Бекзод Маматқулов сўз олиб, бу мавсумга ҳар қачонгидан ҳам пухта тайёргарлик кўрилаётганлиги, юртимизда футзал соҳасида амалга оширилаётган ўзгаришлар, мамлакатимиз мезбонлик қилган футзал бўйича жаҳон чемпионати хулосалари, келгусида BMB PFCнинг халқаро мусобақалардаги иштироки бўйича фикрларини 
билдириб ўтди ҳамда жамоанинг янги аъзоларига омад тилади.
Шунингдек, Ҳолдинг ташаббуси билан ташкил этилган BMB CUP турнири ўз мевасини бераётганлиги, хусусан, мазкур турнирда иқтидорини намойиш этган ёш футзалчилардан бир қанчаси жамоага жалб этилганлиги эътироф этилди.
Қолаверса, клубда легионер футзалчилар сафи ҳам янада кенгайди, жумладан: собиқ жамоалари билан Европа, Осиё ва
Америка қитъаларида чемпион бўлган таниқли футзалчи — Сержино Паулиста ва яна бир иқтидор эгаси — Виктор Ҳуго Пирес Дос Сантос (Витинио)лар ҳам жамоага қўшиб олинди.
Мураббийлар таркибига ҳам профессионал дарвозабонлар мураббийи сифатида 2022-2023 йил айнан BMB PFC сафида меҳнат фаолиятини ўтаган Лига ва Кубок чемпионлигига муносиб ҳиссасини қўшган Витор Вианна ҳам жалб қилинди.
Умуман олганда, миллий чемпионатимизда дунёнинг энг кучли футзал мактаби аъзоларининг фаолият юритиши маҳаллий
футзалчиларда ҳам янгича услуб ва дунёқараш шакллантириши билан аҳамиятлидир.
